... da schließ ich mich doch an und wünsche allen ein tolles Fest!
Advent im Bayrischen Wald:
Eine kleine Weihnachtsgeschichte vom Huber Seppi, einem 10-jährigen Jungen
aus dem Unterland Bayerns.
Der Adpfend ist de schönste Zeit im Winta.
De meisten Leit habm im Winta a Grippe. De is mit Fieber.
Mir hom a oane, owa de is mit Beleichtung und man schreibst mit ´K´.
Drei Wocha bevor´s Christkindl kimmt, stellt da Pappa de Kripp´m im
Wohnzimma auf und mei kloane Schwesta und i derma mithelfa.
Kripp´m san langweile. Owa de unser ned, wei mia habm mordstolle Figurn
drin. I hob amoi an Josef und s´Christkindl auf´n Ofa g´stellt, dass ses
sche warm habm - und des war eahna z´hoass. S´Christkindl is schwarz worn
und an Josef hats in lauta Trümma zrissn. Oa Fuaß vo eahm is bis in
Platzldoag g´flogn und des war koa schöna Anblick.
Mei Mamma hat mi g´schimpft und g´sogt, das ned amoi de Heiligen vor meiner
Bledheit sicha sand. Wenn d´Maria ohne Mo und ohne Kind herumsteht,
schaugst ned guat aus.
Owa i hob Gott seidank vej Figurn in meina Spuikistn - und da Josef is
jetzt da Donald Duck. Ois Chistkindl wollt i an Asterix nehma, wai der so
kloa is, dass er in den Fuadertrog passt.
Owa da hot d´Mama g´sogt, ma ko doch ois Chistkindl koan Asterix hernehma,
do is ja no as verbrennte Christkindl bessa. Es is zwar schwarz, owa
immerhin no a Christkindl.
Hintan Christkindl stehnan zwoa Oxn, a Esl, a Nilpferd und a Brontosaurier.
Des Nilpferd und den Saurier hob i hi g´stellt, wei da Ox und da Esl warn
ma z´langweili.
Links neba den Stoi kemman grod de heilign drei König daher. Oa König is an
Papa im letzten Adpfend beim Putzn owe g´foin und er war total hi. Jetzt
hama nur mehr zwoa heilige Könige und an heiligen Batman als Ersatz.
Normal homand de heiligen Könige an haufa Zeig für´s Christkindl dabei,
nämlich Gold, Weihrauch und Pürree - oda so ähnlich ... Vo de unsan hod
oana anstatt Goid a Kaugummipapierl dabei, des glänzt so schö. Da anda hot
a Marlboro in da Hand, wei ma koan Weihrauch ham. Owa de Marlboro raucht a
schö, wenn mas ozündt. Da heilige Batman hat a Pistoin dabei. Des is zwar
koa G´schenk füa a Christkindl, owa damit konn er´s vom Saurier beschütz´n.
Hinta dene drei Heilige san a por rotheitige Indiana und a kaasiga Engl.
Den Engl is a Fuaß obbrocha, drum haman auf a Motorradl g´setzt, dass er si
leichta tuat. Mit´n Motorradl kann er fahrn, wenn er grod net fliagt.
Rechts neban Stoi habma a Rotkäppchen hig´stellt. Si hod a Pizza und drei
Weißbier füa d´Oma dabei. An Woif hama ned, drum lurt unta am Baam a
Bummerl ois Ersatzwoif viara.
Mehr steht in unsara Kripp´m ned drin, owa des reicht a. Auf d´Nacht schoit
mas Liacht ei und dann is unsa Kripp´m erscht so richte schö. Mia sitz ma
olle do und sing ma Liarda vom Adpfend. Manche gfoinma, owa de meistn san
ma z´luasat.
Mei Opa hot ma amoi a Gedicht vom Adpfend glernt, du des geht so:
Adpfend, Adpfend, da Bärwurz brennt,
erscht dringst oan, dann zwoa, drei, vier,
dann hauts´te mit dem Hirn an d´Tür.
Obwohl des Gedicht recht sche is, hot d´Muata gsogt, das i mir´s ned merka
deaf.
Bis ma schaut, is da Adpfend voabei und d´Weihnacht a und mit dem Johr
geht´s dahi. D´Gschenk san auspackt und man griagt vor Ostern nix mehr,
höx´tns an Geburtstag.
Grüße Sascha
....Und das Wetter spielt ja auch mit 
